Trump është ndalur edhe në një tjetër çështje të rëndësishme si hetimi për Rusinë, teksa ka deklaruar se është këshilluar nga avokatët e tij të mos bisedojë më prokurorin e posaçëm Robert Mueller.

Është vendosur më në fund data dhe vendi ku do të mbahet takimi i shumëpritur mes presidentit amerikan Donald Trump dhe udhëheqësit koreano-verior Kim Jong-un, por detajet nuk do të bëhen menjëherë publike.

Ka qenë vetë kreu i shtetit ai që ka dhënë lajmin, duke ngritur sërish suspancë rreth bisedimeve historike që Trump dhe Kim do të zhvillojnë. Shtëpia e Bardhë është shprehur se takimi historik mes udhëheqësve mund të ndodhë këtë muaj, për sa kohë që Koreja e Veriut bën lëshime të caktuara.

Përpara se të ngjitej në bordin e helikopterit presidencial Marine One, presidenti Trump deklaroi se ka pasur zhvillime të shumta, sa i përket temës së shtetasve amerikanë të arrestuar në Korenë e Veriut, një nga temat më të ndjeshme në marrëdhënien mes palëve.

Gjatë shkëmbimit me gazetarët, Trump gjithashtu deklaroi se avokatët e tij e kanë këshilluar të mos flasë me Prokurorin e Posaçëm Robert Mueller, edhe pse presidenti do të donte të bisedonte me të, si pjesë e hetimit mbi përfshirjen e Rusisë në zgjedhjet e 2016. “Do të doja të flisja me Mueller, sepse nuk kam bërë asgjë të gabuar, por duhet të gjej një mënyrë që të trajtohem drejtësisht,” u shpreh Trump.