Të Infektuar: 14119

Të Shëruar: 10546

Të Vdekur: 563

Suspendohen tre zyrtarë policor nga Podujeva, nuk ndërhynë në një dasmë që po mbahej në këtë komunë

18:49 | 10 Gusht 2020

Ilustrim

Tre zyrtarë policor nga Podujeva mbrëmë janë suspenduar nga puna.

Tre zyrtarë policorë të stacionit policor të Podujevës, janë suspenduar mbrëmë për shkak të dyshimit se nuk kanë përmbushur detyrat zyrtare me rastin e ndërhyrjes në një aheng familjar-dasmë, i cili mbahej në një restorant duke shpërfillur vendimin e qeverisë.

Këtë e ka konfirmuar për Gazetën Online “Reporteri.net” Arbër Beka, zëdhënësi i Inspektoratit Policor.

“Inspektorati Policor i Kosovës mbrëmë (09 Gusht 2020), gjatë realizimit të Planit Operativ “Monitorimi i respektimit të vendimeve mbi zbatimin e masave parandaluese kundër përhapjes së Covid-19”, ka hasur në mos zbatim të Vendimit të Qeverise së Republikës së Kosovës për masat ndaj Covid-19 nga tre zyrtarë policorë në Podujevë”, ka thënë Beka për Reporteri.net.

Beka më tej thotë se krahas kësaj të njëjtit dyshohen edhe për mos zbatimin e Urdhrit Operativ të policisë për gatishmëri dhe reagim për Covid-19 duke mos reaguar në një informatë që kishin pranuar për mbajtjen e një ahengu familjar (dasmë) në komunën e Podujevës.

“Si pjesë e procedurave administrative hetimore të njëjtit janë suspenduar me rekomandim të IPK-së”, ka deklaruar Beka.