Suedia ndërpret kërkimet, s’e gjen nëndetësen ruse
Ushtria suedeze ka vendosur t’i jep fund kërkimeve njëjavore, pas dyshimeve se një nëndetëse ruse lundronte nën ujërat pranë Stokholmit.
Bota
Anijet detare dhe avionët suedezë u kthyen në bazat e tyre pasi kërkimet në arkipelagun e Stokholmit nuk dhanë ndonjë rezultat.
Ditën që ishte bërë i ditur dyshimi, Ministria ruse e Mbrojtjes kishte mohuar lundrimin e ndonjë nëndetëse të saj në ujërat suedeze, mirëpo raportet e tensionuara mes Rusisë dhe Perëndimit bën që deklarata e zyrtarëve rusë të mos merrej si e vërtetë.
Nëndetëse apo çfarëdo qoftë ajo, besohet se ka lënë ujërat territoriale Suedisë.
“Ishte vlerësim i forcave tona mbrojtëse se një aktivitet i huaj nënujor ka ndodhur në arkipelagun e Stokholmit, porse me nisjen e kërkimeve nga ana jonë gjithçka ka marr fund”, tha admirali suedez, Anders Grenstad.
Dyshimet kishin filluar kur në objektivin e një kamere të drejtuar nga arkipelagu u kap një mjet lundrues që dukej sikurse pjesa e epërme e një nëndetëseje.
Operacioni suedez në kërkim të nëndetëses ruse, sipas BBC-së, ishte mobilizimi më i madh ushtarak i këtij vendi që prej Luftës së Ftohtë.