Nesër Hashim Thaçi dhe PDK’ja e tij kanë një përvjetor të veçantë.

E enjtja e 9 janarit shënon ditën kur ai i mbush gjashtë vjet të punës si Kryeministër i Kosovës.

Kështu, Thaçi nesër fillon vitin e shtatë të qeverisjes së tij.

Në një rekapitullim të proceseve që ndodhën dhe punës së bërë gjatë gjashtë viteve të kaluara në krye të ekzekutivit të vendit, Thaçi është shprehur sot se këto kanë qenë vitet e fuqizimit të rendit dhe ligjit, luftës kundër korrupsionit, krimit të organizuar dhe dukurive tjera negative dhe të reformave të thella.

“Nesër, me 9 janar, fillojmë vitin e shtatë të qeverisjes. Ishin vite të rëndësishme të rezultateve të prekshme dhe thelbësore. Vitet e shpalljes së Kosovës shtet i pavarur, demokratik dhe sovran, vite të konsolidimit dhe forcimit të shtetit tonë, të njohjes së pavarësisë së Kosovës nga 104 shtete, të anëtarësimit të Kosovës në Bankën Botërore, në Fondin Monetar Ndërkombëtar, në Bankën Europiane për Rindërtim dhe Zhvillim, Bankën Zhvillimore të Këshilli dhe në shumë organizata rajonale dhe ndërkombëtare”, ka shkruar Kryeministri Thaçi sot në profilin e tij në Facebook.

“Në këto vite përmbyllëm me sukses mbikëqyrjen ndërkombëtare të pavarësisë, filluam procesin dhe jemi në fazën e negocimit të Marrëveshjes së Asociim – Stabilizimit, dhe presim përmbylljen e negociatave në pranverën e hershme”.

“Po ashtu, brenda këtyre viteve Qeveria e Kosovës ka përmbushur pothuajse të gjitha kriteret teknike dhe presim që gjatë këtij viti Komisioni Europian të merr rekomandimin e merituar për heqjen e vizave edhe ndaj qytetarëve të Kosovës”.

“Ishin këto vite të fuqizimit të rendit dhe ligjit, të luftës kundër korrupsionit, krimit të organizuar dhe dukurive tjera negative, vite të reformave të thella demokratike, politike, ekonomike dhe legjislative”.

“Ishin vite të relaksimit të skenës politike, të shtensionimit të marrëdhënieve ndëretnike, të fillimi të marrëveshjes së normalizimit të marrëdhënieve midis shtetit të Kosovës dhe atij të Serbisë”.

“Ishin vite të përmirësimit fundamental të infrastrukturës rrugore, të ndërtimit të rrugës së Kombit dhe të rrugëve tjera regjionale dhe lokale. Sot, Kosova është vendi me infrastrukturë rrugore të ndërtuar në kohë rekorde dhe me aeroportin më modern në rajon”.

“Në këto vite arritëm përmirësimin optimal të furnizimit me energji elektrike, u bënë reforma të rëndësishme në sistemin e edukimit, duke përmirësuar kushtet infrastrukturore në tërë Kosovën me ndërtimin dhe renovimin e mbi 100 shkollave”.

“Në këto vite u vërtetua pafajësia e shumë bashkëluftëtarëve dhe komandantëve të UÇK’së, të cilët u akuzuan padrejtësisht”.

“Gjatë këtyre viteve, duke ngritur disa herë pagat e të gjithë mësuesve, përforcuam mirëqenien për të gjitha kategoritë sociale, duke arritur standarde rajonale. Synimi ynë që të arrijmë standarde europiane”.

“Bashkërisht do të vazhdojmë ta ndërtojmë Kosovën Europiane”, ka thënë Kryeministri Hashim Thaçi.