Shpërthimi ka ndodhur para argjendarisë ‘Murga’ që ndodhet në rrugën ‘Ivo Lola Ribar’ në veri të Mitrovicës, e cila ishte plaçkitur ditë më parë, ndërsa janë shkaktuar dëme të konsiderueshme në dritaret e disa dyqaneve, banesave, por edhe të disa automjeteve që kanë qenë të parkuara në afërsi.

Ngjarjen e ka konfirmuar për Kosovapress edhe shefi i operativës në Policinë e Kosovës për rajonin e veriut, Zhelko Bojiq.

Ai ka thënë se rreth orës 2:10 minuta në rrugën ‘Ivo Lola Ribar’ në veri të Mitrovicës ka ndodhur një shpërthim që dyshohet të jetë bombë, por që fatmirësisht nuk ka pasur të lënduar në njerëz.

Sipas tij, janë shkaktuar dëme materiale në 4 automjete, një kioskë, disa dyqane, si dhe janë thyer dritaret në disa banesa në afërsi, ndërsa pjesëtarët e policisë kanë dalë në vendngjarje dhe janë në pritje të ekipeve të specializuara për të zhvilluar hetimet.