Shoqëritë ‘offshore’ të bëjnë transparent identitetin e përfituesve të vërtetë

21:30 | 15 Prill 2016

Vendet e pasura dhe ato në zhvillim të G20-Financë kërkuan miratimin e mjeteve për të vënë në dijeni se cilët janë ata persona që fshihen pas shoqërive offshore, epiqendra e skandalit të “Panama Papers”, sipas një projekt-deklarate të publikuar sot nga media.

Takimi në Uashington, me pjesëmarrjen e disa shteteve kërkon kryesisht identifikimin deri në korrik të parajsave tatimore jo-bashkëpunuese dhe parashikon marrjen e “masave shtrënguese” kundrejt tyre, sipas këtij dokumenti.

Ky është reagimi i parë ndërkombëtar përballë skandalit të “Panama Papers” që përfshin një sistem të gjerë të evazionit fiskal nëpërmjet shoqërive fantazmë që fshehin identitetin e përfituesve të vërtetë.

Në një deklaratë të ministrave të Financave të G20-ës u argumentua se përmirësimi i transparencës ndaj përfitueve është jetike për të mbrojtur integritetin e sistemit financar ndërkombëtar dhe për të parandaluar përdorimin e këtyre subjekteve për qëllime korruptisioni dhe shmangien nga tatimet.