Shërbimi sekret serb ka incizuar takimet e Daçiqit me bosin e drogës (Video)
Në video inçizimet sekrete të cilat i kanë siguruar gazetarët e rrjetit hulumtues të Krimit dhe Korrupsionit -KRIK shfaqet takimi i Ivica Daçiq me bossin e drogës Radoljub Raduloviq.
![](https://lajmi.net/wp-content/uploads/2015/09/188.jpg)
Lajme
Në këto video që janë regjistruar nga kamerat e agjentëve serbë të inteligjencës shihet Daçiq, i cili asokohe shërbente si Ministër i Punëve të Brendshme, si dhe bashkëpunëtorët nga kabineti i tij qeveritar Branko Lazareviq, Vanja Vukiqi dhe Ivica Tonçev, në takime që i realizuan me bosin Raduloviq në restorante, kafeteri dhe parkingje të Beogradit, transmeton Klan Kosova.
Radulloviq, shef i narko-kartelit serb, i njohur për publikun si “Misha Banana” ose “Misha Amerika”, aktualisht gjendet në arrati.
![YouTube player](https://i.ytimg.com/vi/wLCVn31UeHg/maxresdefault.jpg)
Ai ishte bashkëpunëtor i ngushtë i bossit tjetër Darko Shariq, i cili u dënua me 20 vjet burg për kontrabandën e 5.7 tonëve të kokainës.
Për të njëjtën çështje Radulloviq u pat dënuar me 12 vjet e gjashtë muaj burgim.
Në ndërkohë, njohjen me të nuk e kishte mohuar kurrë shefi i diplomacisë serbe i cili pati insistuar vazhdimisht se ajo daton nga koha para se ai të vinte në krye të Ministrisë së Brendshme.
![YouTube player](https://i.ytimg.com/vi/MkWL5404qbk/maxresdefault.jpg)
Raportohet se videot janë bërë gjatë nëntë takimeve të realizuara në periudhën prej 29 nëntorit të vitit 2008 deri më 7 prill të 2009, që Raduloviq i pati me krerët e MUP-it.
![YouTube player](https://i.ytimg.com/vi/kVxBW3Bsd0Q/maxresdefault.jpg)
Publikimi i këtyre pamjeve të takimit të kryediplomatit aktual serb me një nga bossët e drogës japin detaje të reja në rastin i cili në muajt e parë të vitit 2013 kërcënonte me rrëzimin e qeverisë serbe në të cilën Ivica Daçiq ishte Kryeministër dhe njëherit Ministër i Brendshëm.
Daçiq asokohe e kishte pranuar se me Raduloviqin ishte takuar disa herë, por nuk kishte informata se ai ishte pjesë e grupit kriminal të Shariqit.