Situata në veri të Kosovës vazhdon të jetë e tensionuar. Pasditen e së hënës mbetën të plagosur 30 ushtarë të KFOR-it pas një përplasje me serbët, të cilët kundërshtojnë hyrjen e kryetarëve të rinj të komunave veriore me shumicë serbe, në zyrat e tyre për të vijuar punën.

Shefi i EULEX në Kosovë, Lars-Gunnar Wigemark, në një intervistë për ABC News, bëri thirrje për qetësim të situatës. Ai tha se aktet e dhunës nuk janë zgjidhje ndërsa shtoi se sundimi i ligjit është një çështje thelbësore.

“Do të këshilloja një armëpushim të menjëhershëm ndaj të gjithë dhunës, që protestuesit të tërhiqen, që të gjithë aktorët, përfshirë edhe policinë e Kosovës, natyrisht që duhet të tregojnë përmbajtje. Ne e dimë se ka pasur shqetësime në lidhje me policinë e Kosovës, në veçanti për njësitë speciale, por përsëri, këto çështje duhet të diskutohen në një mënyrë të qetë dhe të rregullt.”, tha ai.

Pjesë nga intervista:

Unë sigurisht që do të këshilloja një armëpushim të menjëhershëm ndaj të gjithë dhunës, që protestuesit të tërhiqen, që të gjithë aktorët, përfshirë edhe policinë e Kosovës, natyrisht që duhet të tregojnë përmbajtje. Ne e dimë se ka pasur shqetësime në lidhje me policinë e Kosovës, në veçanti për njësitë speciale, por përsëri, këto çështje duhet të diskutohen në një mënyrë të qetë dhe të rregullt. Ka një vakum sigurie në veri të Kosovës që nga fundi i vitit të kaluar, që nga nëntori, duke filluar me dorëheqjen e të gjithë policëve serbë të Kosovës, por edhe të gjyqësorit dhe katër kryetarëve të komunave, siç e dini, kjo ishte arsyeja pse u bënë zgjedhje të reja, të caktuara në fund të dhjetorit të vitit të kaluar. Më pas zgjedhjet u shtynë për shkak të shqetësimeve të sigurisë. Dhe ne mund të shohim tani se ndoshta disa nga ato shqetësime ishin reale, megjithëse kur u zhvilluan zgjedhjet në prill, ato ishin mjaft të qeta. Por shumica ose të gjithë serbët e Kosovës i bojkotuan zgjedhjet. Pra, ka një lloj sekuence ngjarjesh.

Mendoj se EULEX-i ndihmoi në deskalimin e situatës në fund të vitit të kaluar, e cila përfundimisht çoi në heqjen e barrikadave e kështu me radhë. Fundi i kësaj, siç thashë, duhet të jetë dhe përfundimisht do të jetë në një fazë, më shpejt se sa vonë në tryezën e negociatave nën lehtësimin, shpresoj, të Bashkimit Evropian dhe me mbështetjen e të gjithë lojtarëve të tjerë. Mund të ketë lojtarë që dëshirojnë të shohin një përkeqësim të situatës së përgjithshme. Dhe për ta, mendoj se ne vetëm mund të dënojmë qëllimet e tyre nëse ata duan të shohin njerëz të plagosur, qofshin ushtarë apo civilë apo kushdo tjetër, gazetarë, media. Sot ka pasur një sërë sulmesh ndaj ekipeve mediatike. Unë mendoj se ju e përmendët atë. Sot u ekspozuat edhe ju. Dhe ky është vetëm një rreth vicioz, siç thamë, një përshkallëzim spiral. Pra, kjo duhet të ndalet dhe në vend të kësaj duhet të ketë një spirale pozitive, le të themi, të kthimit, para së gjithash, të uljes së tensioneve, kthimit në qetësi.

Unë mendoj se njerëzit në veri të Kosovës, e kam vënë re këtë, e kam thënë këtë gati një vit më parë, ata janë të frikësuar. Ata kanë frikë. Ka pasur shumë lëvizje gjatë një viti e gjysmë. Mendoj se kjo intervistë është shumë e shkurtër për te shpjeguar të gjitha arsyet, por ne kemi parë një lloj përshkallëzimi gradual të hapave të ndërmarrë. Pati sulme më shumë se një vit më parë në një numër patrullash të policisë së Kosovës pasi ato po përpiqeshin të mbyllnin disa nga rrugët e kontrabandës që kalonin në mes të të ashtuquajturit kufiri i gjelbër atje. Kishte, siç thashë, akuza, pretendime ndaj njësive speciale të policisë së Kosovës për përdorim të tepruar të forcës kundër civilëve. Ka një mosmarrëveshje të gjatë për targat. Ka pasur shpronësime të tokave që u përkasin banorëve lokalë në veri të Kosovës me qëllim që, ne supozojmë, ose dimë të paktën një ose dy raste, ndërtim të hapësirave të reja policore, gjë që është një burim shqetësimi për popullatën locale, duke thënë pse duhet të ketë më shumë polici këtu? Nuk ka asgjë për t’u frikësuar, e kështu me radhë. Në të njëjtën kohë ne e dimë se ka elementë shumë të fortë kriminalë, krim I organizuar në veri të Kosovës që përfitojnë nga kjo mungesë stabiliteti, pasigurie, jam i bindur se shumica e serbëve të Kosovës do të preferonin të mos i kishin këta elementë.