Në një intervistë dhënë për Botapress, Sfarqa ka thënë se kriza politike është duke shkuar drejt fazës përfundimtare.

“Gjërat po lëvizin, por jo ndoshta me shpejtësinë e dëshiruar, por fakti që po hyjmë në ‘orbitën’ e konsultimeve intensive, jo vetëm brenda Bllokut por, edhe me faktorët relevantë të brendshëm e ndërkombëtarë (si faktorë stabiliteti), tregon që po hyjmë në fazën përfundimtare të zgjidhjes së problemit si detyrë dhe përgjegjësi politike dhe shtetërore”.

Sipas Sfarqës, rikonfigurimi i marrëveshjes në mes të LDK-së, AAK-së dhe Nismas është i pashmangshëm.

Ai thotë se pas vendimit të Gjykatës Kushtetuese, përmes të cilit PDK ka të drejtë eksluzive për të propozuar kryeparlamentarin, LDK-ja si forca më e madhe politike brenda Bllokut, duhet tashmë të marr postin e Kryeministrit.

“Në këtë drejtim, i bie që rikonfigurimi i brendshëm i figurave kyqe të Bllokut, po shfaqet si i pashmangshëm”.

“Meqenëse Gjykata Kushtetuese e ka bërë të pamundur realizimin e pjesës së marrëveshjes që ka të bëjë me zgjedhjen e kryeparlamentarit, atëherë LDK-ja, si forca kryesore politike e Bllokut, nuk mund të mbetet pa asnjë pozitë të rëndësishme në Institucionet e vendit. Këtë, madje nuk ia lejon as forca e saj politike që mund të matet qoftë me vota në zgjedhjet nacionale, qoftë me numrin e deputetëve në Kuvend”.

“Prandaj është e moralshme dhe imperativ politik që të rikonfigurohet Marrëveshja e Bllokut, duke e marr LDK-ja pozitën e kryeministrit, diçka që i ka munguar Kosovës në historinë e pasluftës, madje edhe atëherë, kur kjo parti i ka fituar zgjedhjet me shumicë absolute, por edhe atëherë, kur njërit nga pretendentit të Bllokut për kryeministër, Ramush Haradinajt, iu dha funksioni i kryeministrit të vendit, në të mirë të shtetit, siç do të duhej të ndodhë edhe tash, por në pozita të ndryshme, kur këtij lideri partiak i takon që ta bëjë këtë sakrificë për shtetin e Kosovës dhe për kthimin e borxhit ndaj LDK-së. Ai dhe të gjithë faktorët e tjerë të Bllokut do të jenë pjesë rrjedhëse e të gjitha zhvillimeve pozitivie të cilat do të mund t’i bëjnë vetëm së bashku dhe asesi të ndarë”.

“Me këtë akt, ai do të mbetet një shembull – model i një politikani të përgjegjshëm me përmasa të mëdha”, tha për Botapress, Muharrem Sfarqa.