Delegacionin e Beogradit në këto konsultime do ta udhëheqë Marko Gjuriq, drejtor i zyrës që qeverisë serbe për Kosovën, njofton agjencia serbe e lajmeve Beta.

Sipas kësaj zyre, “pas përmbushjes së obligimeve të pranuara në fushën e telekomunikacionit, energjetikës dhe hartimit të draftit për Asociacionin e komunave serbe në Kosovë”, do të jetë më e qartë çështja e raportimit për kapitullin 35 të negociatave të Beogradit me BE-në sa i përket anëtarësimit.

“Presim që në mënyrë pozitive të valorizohet përpjekja e Serbisë që ën për normalizimin e marrëdhënieve ndërmjet Beogradit dhe Prishtinës dhe në mënyrë të përgjegjshme t’i qasen dialogut dhe problemeve në Kosovë e Metohi”, njoftoi kjo zyrë.

Por, siç dihet në çështjen e telekomunikacionit punët janë në vendnumëro, në energjetikë nuk po ndodh pothuaj asgjë, kurse problemi kryesor që BE-ja nuk e toleron është liria e lëvizjes, e cila është ende larg përmbushjes.     

Të enjten ne Bruksel mbahet takimi i rregullt i përfaqësuesve të Prishinës e Beogradit për zbatimin e marrëveshjes së Brukselit.  

“Progresi në zbatimin e marrëveshjes do të jetë temë e takimit të së enjtes në të cilin do të gjenden zgjidhjet për problemet vijuese”, thuhet në njoftimin e kësaj zyre.

Delegacioni kosovar në takimin e nesërm e udhëheq Edita Tahiri, zëvendëskryeministre në detyrë, e cila sot ka udhëtuar për në Bruksel.