Selimi i kërkon Thaçit që situatën politike ta merr më seriozisht

Zëvendëskryeministri, Hashim Thaçi, e quan qesharake mundësinë për zgjedhje të reja.

Lajme

23/10/2015 13:50

Ai thekson se opozitës po i mungon vizioni duke ripërsëritur se nuk do të ketë zgjedhje të reja, zgjerim të koalicionit e as Qeveri teknike.

Por, deputeti i lëvizjes Vetëvendosje!, Rexhep Selimi ka thënë se nuk do të duhej të interpretohet si qesharake diçka që është shumë serioze.

“Çështja e zgjedhjeve të parakohshme do të duhej të interpretohej nga Ministri i Jashtëm, ashtu siç është e jo siç ka dëshirë ai. Qeveria, por edhe Ministri i Jashtëm duhet ta marrin shumë seriozisht këtë situatë, sepse vërtetë situata është serioze e jo qesharake “ ka thënë, Selimi për Shqip.Press.

Thaçi, thotë se zgjedhjet e kaluara, ishin nga më të vlerësuarat dhe rezultati i tyre u pranua nga të gjitha partitë.

“Unë vlerësoj opinionet e analistëve të ndryshëm por një vlerësim i tillë është qesharak. Ne kemi mbajtur zgjedhje të shkëlqyera në qershor të vitit 2014. Gjithë spektri politik ka pranuar rezultatin. Tërheqje nuk do të ketë, as Qeveri teknike, nuk do të ketë as zgjerim të Qeverisë por natyrisht zgjedhjet e ardhshme do të mbahen në qershor 2018”, ka thënë Thaçi për transmetuesin publik.