Kishte planifikuar që gjatë muajve të verës kur fillojnë pushimet në shkollë të kryejë edhe një intervenim kirurgjik, shkruan “Tribuna”.

Por, mësimdhënësi 61 vjeçar nga Drenasi, Ajet Kadriut, i duhet të presë shtatorin kur fillojnë mësimet për të kryer intervenimin kirurgjik.

Kjo, pasi disa klinikat e Qendrës Klinike Universitare të Kosovës kanë pushuar së kryeri operacionet joemergjente.

“Më duhet që intervenimin ta kryej në Laparaskopinë e QKUK-së. Më patën thënë ta lë më vonë sepse nuk është diçka emergjente. Qëllimisht e kisha lënë gjatë verës që të mos humbi mësimin. Por, tash shumica e stafit ishin në pushime edhe ishte problem të kryehej kjo punë pasi që Laparaskopia ishte në pushim të plotë”, thotë ai.

E vetmja zgjidhje, siç thotë ai, këtu është që këtë intervenim ta kryejë në sektorin privat, çfarë kërkon edhe kosto.