Real Madrid është në formë të jashtëzakonshme. Gjiganti madrilen mposhti Real Sociedadin me rezultat të thellë 5:1 në Santiago Bernabeu, ndeshje e vlefshme për xhiron e 13-të në La Ligë.

Nëse në javët e fundit, skuadra e trajnerit Carlo Ancelotti ka pranuar nga mesatarisht dy gola për ndeshje, së paku në sulm nuk ka asnjë problem pasi po realizon pa problem.

Cristiano Ronaldo shënoi het-trik, të 19-tin e tij nga viti 2009 kur iu bashkua gjigantit nga Santiago Bernabeu derisa Los Blancos e dominuan përballjen ndaj Real Sociedadit, skuadër kualitative, e cila në mesjavë barazoi pa gola kundër Manchester Unitedit në Ligën e Kampionëve.

Golat e tjerë për Realin i shënuan Karim Benzema dhe Sami Khedira, kurse shënimi i vetëm i mysafirëve erdhi nga Antoine Griezmann.

Me këtë fitore, Reali u ngjit në kuotën e 31 pikëve, tri më pak se lideri Barcelona që të dielën ndeshet me Real Betisin.