Të Infektuar: 1147

Të Shëruar: 874

Të Vdekur: 30

Reagon Molliqaj pasi Kurti tha se ministrja Hajdari ka punuar sot edhe pse i vdiq babai

21:04 | 7 Prill 2020

Dardan Molliqaj

Kryetari i Partisë Socialdemokrate, Dardan Molliqaj, ka reaguar pas konferencës së përbashkët të kryeministrit në detyrë, Albin Kurti dhe ministres në detyrë të Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike (MEPTINIS), Rozeta Hajdari.

Molliqaj e ka quajtur gjestin e Kurtit instrumentalizim të tmerrshëm dhe populizëm që tejkalon cdo limit. Ai tha se Kurti po dëshiron të thotë se Lëvizja Vetëvendosja nuk qajnë, nuk mërziten nuk firkësohen as nuk lodhën, përshkrim që sipas Molliqajt i përshtatet bolshevikeve që janë në luftë të vazhdueshme.

“Gjesti i sotëm i Kurtit me ministren Hajdari sot është instrumentalizim i tmerrshëm, dhe popullizëm që tejkalon çdo limit. Është jo njerëzor. Rasti i vdekjes së babait duhet të ishte pushim për të. Por, Kurti dëshiron të na thotë se këta të VV-së janë të ndërtuar nga një material tjetër, se nuk janë njerëz si të tjerët: nuk qajnë, nuk mërziten, nuk frikësohen as nuk lodhen. Ky është përshkrimi bolshevik i njerëzve në luftë të vazhdueshme”, ka shkruar Molliqaj në Facebook.

Më poshtë gjeni shkrimin e plotë të Molliqat:

“Fushata e Kurtit ‘kapje në emër të ç’kapjes’ nuk ka të ndalur. Sot e paska emëruar edhe një anëtar tjetër nga VV si Kryeshef Ekzekutiv në Ujësjellësin ‘Prishtina’. Njerëzit, me të drejtë janë të lodhur deri në rropatje nga keqqeverisja e keqpërdorimet. Por, qeveria në ikje, perspektivë zhvillimore nuk iu ka dhëne, mjafton ta shihni programin për këtë. Por, po iu jep hakmarrje me lugë. Pak nga pak.

Në konferencën e sotme Kurti fjalë për fjalëpërfjalshëm e ka konfirmuar kritikën tonë. Ai na tha se ekspertët e pavarur nuk po guxojnë ta luftojnë korrupsionin, prandaj duhet të vijnë nga VV ose të jenë mbështetës. Sepse Partia ta jep guximin, dijen e moralin.

Secila kapje në emër të ç’kapjes ka rezultuar ne regjime edhe më të dhunshme. Historia është plot me raste të tilla, nga Lindja në Perëndim. Në komunikatën e fundit kemi thënë: ‘kjo që po e shohim tani është përsëritje e vagullt e përvojave të shekullit të kaluar. Kapja në emër të ç’kapjes, është në logjiken e njëjtë me diktaturën e partisë kundër shfrytëzimit dhe diktatit të kapitalit’. Përkohësisht, na tha, përkohësisht. Kjo përkohësi nuk është kryer kurrë. Sepse telosi historik arsyeton gjithçka në emër të qëllimit të madh në fund. Gjithmonë, duke pretenduar se kemi qasje në fatet e historisë. Përkohësia e tyre është e përhershme sepse në fund s’do të jemi asnjëherë, sepse historia s’ka fund.

Gjesti i sotëm i Kurtit me ministren Hajdari sot është instrumentalizim i tmerrshëm, dhe popullizëm që tejkalon çdo limit. Është jo njerëzor. Rasti i vdekjes së babait duhet të ishte pushim për të. Por, Kurti dëshiron të na thotë se këta të VV-së janë të ndërtuar nga një material tjetër, se nuk janë njerëz si të tjerët: nuk qajnë, nuk mërziten, nuk frikësohen as nuk lodhen. Ky është përshkrimi bolshevik i njerëzve në luftë të vazhdueshme”