Por, radha e tij u tejkalua dhe rasti u mor përsipër nga prokurorja Vahide Badivuku, për çka ajo po hetohet.

KTV-ja ka mësuar nga burime të afërta me hetimet që po zhvillohen ndaj saj se rasti i vrasjes do të duhej t’i caktohej një prokurori tjetër që ishte në radhë, por ai u tejkalua dhe rasti iu dha prokurores Vahide Badivuku.

Caktimi i lëndëve bëhet në bazë të një procedure standarde. Prokurorët kanë numra të tyre dhe pastaj në bazë të tyre dhe në mënyrë rendore, Administrata e Prokurorive ua cakton lëndët.

I vetmi koment që ka pasur prokurorja Badivuku është se është e kënaqur me procedurën disiplinore që ka nisur ndaj saj.

Ajo ka thënë për televizionin se është e rëndësishme që të qartësohet rasti, që sipas saj, është i gjithi në përputhje me ligjin, përcjell koha.net. Zyra e Prokurorit Disiplinor të enjten ka nisur procedurë ndaj Prokurores, e cila ka hetuar rastin e vrasjes së kryer nga Gani Geci dhe ka ngritur aktakuzën ndaj tij.

Badivuku, prokurore në Prokurorinë Themelore të Mitrovicës, po hetohet për mundësinë e ndonjë ndikimi, qoftë brenda këtij institucioni apo jashtë.

Por, ajo nuk pranon të ketë pasur ndërhyrje, kërcënim apo presion për veprimet e ndërmarra për rastin. Për veprimet e Badivukut është ankuar edhe Shkumbin Mehmeti, i dënuar për vrasjen e dy policëve, njëri i UNMIK-ut e tjetri i Kosovës, i cili është përmendur në aktakuzë.

Ai gjithashtu është dëshmitar bashkëpunues i EULEX-it, raporton KTV.