Sulmuesi i Paris Saint-Germain, Zlatan Ibrahimoviç ka thënë se gjiganti francez do të shprehë interesim për transferimin e Lionel Messit, nëse Barcelona shfaq gatishmëri për shitjen e tij.

PSG, klub i përkrahur financiarisht nga sheiku Nasser Al-Khelaifi spekulohet se dëshiron ta blejë yllin argjentinas. Dhe, Ibrahimoviç e ka konfirmuar këtë.

“Nëse Messi është në shitje, PSG do të jetë aty, duke bërë përpjekje për transferimin e tij. Për të ëndërruar sukses të madh nevojiten futbollist që ju bëjnë të ëndërroni, i tillë është Messi”, deklaroi ylli suedez për mediat në Katar.

PSG do të ndeshet me Real Madridin në Katar më 2 janar në kuadër të një ndeshje miqësore.

“Do të jetë një duel mes dy ekipeve fantastike, një mundësi e mirë për njerëzit në Katar. Për ta mund të jetë si një finale e Ligës së Kampionëve”, përfundoi ai.