Protesta nëse nuk thirret seanca

Deputetja e Lëvizjes Vetëvendosje, Albulena Haxhiu mendon se refuzimi i Flora Brovinës për ta thirrur vazhdimin e seancës konstituive dhe mosveprimet e Presidentes Atifete Jahjaga në këtë drejtim, po i shërben vazhdimit të “zaptimit të vendit nga PDK”.

Lajme

12/11/2014 22:16

Haxhiu ka thënë se nëse vazhdohet që të mos thirret seanca konstituive, atëherë, sipas saj, protestat jo që janë të nevojshme por të domosdoshme.

Më poshtë mund të lexoni deklaratën e plotë të deputetes Albulena Haxhiu të postuar në rrjetin social Facebook:

Mos thirrja e seancës nga Flora Brovina dhe mosveprimet e Presidentes (në udhëzimin e F.B për të vazhduar me seancën konstituive) janë në shërbim të qëllimit të PDK-së për të vazhduar me zaptimin e vendit dhe Kuvendit dhe për të mos hequr dorë nga pushteti!

Të qenurit kryesuese e seancës konstituive (për shkak të moshës) do të thotë të përfaqësosh vullnetin e shumicës parlamentare dhe jo direktivat e një pakice siç është PDK!

Nëse F.B nuk e thërret vazhdimin e seancës dhe nëse Presidentja ( që e ka obligim kushtetues të kujdeset për vazhdimin e seancës konstituive) sillet thuajse nuk ka ndodhur asgjë (heqja dorë nga kryeparlamentari), protestat jo që janë të nevojshme por janë edhe të domosdoshme!

Për heqjen e këtij regjimi, deri në çkapjen e shtetit!