Protesta në Barcelonë pas dënimit të udhëheqësve katalonjas
Policia spanjolle u përlesh me protestuesit të cilët u mblodhën në aeroportin e Barcelonës, pas shpalljes së dënimit nga Gjykata Supreme, për 12 udhëheqës të lëvizjes për pavarësi të Katalonjës.
![](https://lajmi.net/wp-content/uploads/2019/10/649BECA7-A1F0-42D4-9B97-9F1AE5F1D655_w1023_r1_s.jpg)
Bota
Policia përdori shkopinj kundër protestuesve, të cilët ishin mbledhur afër hyrjes së metrosë, brenda terminalit kryesor të aeroportit të Barcelonës.
Autoritetet urdhëruan pezullimin e trafikut të metrosë në aeroport.
Administrata e aeroportit tha se të paktën 20 fluturime u anuluan për shkak të protestave.
Më parë, Gjykata Supreme dënoi nëntë udhëheqësit e Katalonjës për rolin e tyre në përpjekjet për pavarësi të rajonit në vitin 2017.
Tre të akuzuar tjerë u shpallën fajtorë dhe u gjobitën, por nuk do të vuajnë dënimet me burg.
Të 12 politikanët dhe aktivistët i kishin mohuar të gjitha akuzat.
Në përgjigje të vendimit, mijëra mbështetës të pavarësisë së Katalonjës marshuan në Barcelonë, përpara se të bllokonin disa rrugë dhe qasjen në stacionet e metrosë.
Në Katalonjë, më 1 tetor të vitit 2017, është mbajtur një referendum, në të cilin shumica e atyre që kanë marrë pjesë, kanë votuar për pavarësi nga Spanja.
Megjithatë, në referendum pjesëmarrja ka qenë e ulët dhe ai është shpallur i paligjshëm nga Gjykata Kushtetuese e Spanjës.
Qeveria qendrore në Madrid ka shtrirë qeverisjen në rajon dhe disa udhëheqës katalanas kanë ikur nga vendi ose janë ndaluar. /rel