Sipas burimeve të agjencisë së lajmeve AFP, sulmi ndaj aeroportit ndërkombëtar në Lugansk filloi mbrëmë pas inaugurimit të presidentit ukrainas, Petro Poroshenko, dha ka vijuar sot në mëngjes i deklaroi agjencisë franceze të lajmeve një burim nga ushtria ukrainase. Ai tha se në anën e forcave ukrainase që e mbrojnë aeroportin nuk ka pasur asnjë viktimë.

“Është e qartë se rebelët pro-rusë po përpiqen të shkatërrojnë ndërtesën që kontrollon furnizimin e aeroportit me energji elektrike”, i tha agjencisë AFP me telefon një pjesëtar i forcave ukrainase që janë të ngarkuara për sigurinë e aeroportit.

Në të njëjtën kohë Ushtria e Ukrainës po granaton qendrën e qytetit Slloviansk, në rajonin e Donjeckut, në lindje të Ukrainës, deklaroi të dielën zëdhënësja e qytetit, Stela Horosheva.  

“Qendra e qytetit është nën zjarr artilerie. Një nga granatat ka shpërthyer afër ndërtesës ku gjendet selia e qeverisë së qytetit”, tha ajo për agjencinë ruse të lajmeve Itar-Tass.

Tash për tash nuk ka të dhëna për viktima, por sasitë e ujit të pijshëm janë të limituara, ndërsa një pjesë e madhe e qytetit është pa energji elektrike.