“Der Spiegel” raporton se Gjermania deri tani këtë vit ka deportuar më shumë se 10 mijë shtetas të huaj, por shumica e tyre janë nga vendet e Ballkanit Perëndimor, kryesisht nga Serbia dhe Maqedonia, përcjell albinfo.ch.

Gjermania pret në vitin 2015 një fluks prej 800 mijë refugjatësh dhe emigrantësh nga Lindja e Mesme dhe Afrika, të cilët janë katër herë më shumë në krahasim me vitin 2014. Pritet që numri i njerëzve të cilët do të kërkojnë strehim në Gjermani deri në fund të vitit të kalojë shifrëm një milion njerëz.

Me ligjet dhe rregulloret relativisht liberale për dhënien e azilit, Gjermania është ndër vendet e Bashkimit Evropian me numrin më të lartë të personave të pranuar që ikin nga luftërat në Lindjen e Mesme, si dhe emigrantë ekonomikë që vijnë nga Evropa Juglindore.

Kreu i Agjencisë Federale për Migrim, Manfred Schmidt, tha për Der Spiegel se autoritetet do të vendosin deri në fund të vitit 2015 për më shumë se 75 mijë kërkesa azili nga vendet e Ballkanit Perëndimor, dhe kjo është pothuajse e sigurt që të gjithë ata do të refuzohen.