Prishtina voton

Qytetarët e Prishtinës kanë shfytëzuar minutat e parë të hapjes së qendrave të votimit për të votuar kandidatin e tyre të preferuar për Kryetar të Kryeqytetit, në garën e fortë mes Isa Mustafës së LDK’së dhe Shpend Ahmetit të Vetëvendosjes.

Lajme

01/12/2013 08:17

Gara e fortë mes Isa Mustafës së LDK’së dhe Shpend Ahmetit të Vetëvendosjes do të marrë epilog sot.

Qytetarët e Prishtinës kanë shfaqur interesim të madh për të dalë në votime, duke e bërë edhe më të zjarrtë garën për Kryetarin e ardhshëm të Kryeqytetit.

Të gjitha qendrat e votimit janë hapur me kohë dhe qysh në mëngjes është vërejtur një interesim i mirë i qytetarëve për të votuar, të cilët presin që këto zgjedhje të prodhojnë zgjidhje për problemet e tyre.

Menaxheri i Qendrës së Votimit 1912,  në Sallën e Sporteve 1 Tetori, Liridon Morina njofton se procesi i votimit në këtë qendër po shkon mirë dhe pa probleme.

“I gjithë procesi si duket do të shkojë mirë, materialet kanë ardhur me kohë e po ashtu edhe komisionarët”.

“Gjithashtu puna ka filluar me kohë dhe kemi edhe votuesit e parë”.

Shumica nga qytetarët e intervistuar pas votimit kanë thënë se presin që të rregullohet furnizimi me ujë, të zgjidhen problemet me transportin urban, ndërtimet pa leje, qerdhet për fëmijë etj.

\"votimet\" \"votimi\"

Visar Kastrati ishte votues i parë në sallën 1 Tetori. Ai thotë se pret që së pari zgjedhjet ët jenë fer, të lira dhe demokratike.

“Të jetë një proces i rregullt zgjedhor ashtu si procesi paraprak. Jemi në balotazh dhe uroj të mos ketë ndonjë prolongim dhe fituesi të përcaktohet mbi bazën e vullnetit të qytetarëve të Prishtinës”.

Edhe në Shkollën Fillore “Nami Frashëri”, vendvotimet janë hapur me kohë.

Drejtoresha e shkollës, Drita Hyseni thotë se gjithçka është shkuar si duhet.

“Në shkollën tonë janë dy qendra votimi me nëntë vendvotime, dhe të gjitha janë hapur në orën 07:00 dhe kemi edhe votuesit e parë që kanë ardhur posa janë hapur votimet”.

Qytetari i parë që votoi në këtë qendër ishte Jeton Latifi, i cili shpreson se që procesi i votimit të shkojë në rregull, pa probleme, pa tendenca për manipulime dhe keqpërdorime.

“Do t’i japim besimin tonë kandidatit i cili besojmë se do të angazhohet me tepër për ne”.

Jeta Statovci ishte një votuese tjetër në këtë qendër votimi.

“Sapo përfundova procesin e votimit. Po me vjen mirë që po shoh një numër të konsiderueshëm të qytetarëve që po marrin pjesë në këto votime dhe që kanë vendosur që të kryejnë obligimin e tyre si qytetarë të Prishtinës”.

“Shpresoj të fitojë më i miri\”.

\”Ka vullnetin për të përmbushur vullnetin e qytetarit dhe të mirës së këtij vendi”.

 

(Kosovapress, lajmi.net)