Lëvizja Vetëvendosje ka mbajtur tubimin përmbyllës në Prishtinë, në të cilin lideri i saj Albin Kurti dhe Kandidati për Kryetar të Prishtinës, Shpend Ahmeti, kanë thënë se Prishtinës “po i vjen pranvera në mes të dimrit”.

Shpend Ahmeti do të bëjë ndryshime klimatike në politikën kosovare e posaçërisht në Prishtinë.

Kështu, sipas Albin Kurtit, zgjedhja e Kandidatit të VV’së për Kryetar të Prishtinës do të bëjë që në Prishtinë të arrijë stina e Pranverës ende pa ardhur Dimri.

Në fushatën përmbyllëse të VV’së në Prishtinë, Kurti tha se “me Shpendin Kryetar të Prishtinës, do të ndërrojë politika e partisë e cila po i ndëshkon qytetarët për vota”.

“Me Shpendin Kryetar të Prishtinës do të ketë ushqim e libra për nxënësit, respekt e kushte pune për arsimtarët, pensione të dinjitetshme për pensionistët, nderim dhe përkrahje për veteranët e UÇK’së, punësim për të rinjtë, subvencione për bujqit dhe një pension gjithnjë të dinjitetshëm për Isa Mustafën”.

Asfaltimi i dobët i rrugëve, sipas Kurtit, do të shkrihet së bashku me kryetarin aktual të Prishtinës, Isa Mustafa.

“Ky asfalt është i pa qëndrueshëm sepse do të zhduket së bashku me borën në pranverë. Kurse Kryetari në ikje është edhe më i pa qëndrueshëm sepse ai do të largohet pas 1 dhjetorit kur në mes të dimrit, nis pranvera politike në Prishtinë”.

“Me Shpend Ahmetin Kryetar të Prishtinës, do të ndihmojmë komunën duke e zhvilluar atë dhe duke e luftuar korrupsionin”.

Shpend Ahmeti, ndërkaq, ka shpalosur në pika të shkurtra programin për qeverisjen në Kryeqytet.

Ahmeti ka kërkuar nga banorët e Prishtinës që të ruajnë programin e tij që po e premton dhe të kërkojnë llogari nga ai në rast të mos përmbushjes së zotimeve.

“Në fletushkën e zotimeve që ju kemi dërguar, ne kemi paraqitur zotimet tona për një mandat 4 vjeçar. Ju them që ta ruani dhe të na kërkoni llogari gjatë këtij mandati”.

“Ne do siç kemi premtuar, do t’ju sigurojmë ujë… Me qenë se në Prishtinë në vitet e kaluara është rritur numri i fëmijëve, ndërsa vendet në çerdhe është zvogëluar, ne premtojmë rritje të objekteve të këtyre institucioneve parashkollore… Premtojmë ndërtim të tregut të prodhimeve vendore”.

Ahmeti, ka bërë edhe një premtim interesant, duke thënë para të pranishmëve se në rast se merr mandatin e kryetarit të Komunës së Prishtinë, mjet të vetëm të transportit do te ketë transportin publik pasi që premtoi do ta shesë veturën zyrtare të Kryetarit të Komunës qysh në ditët e para të qeverisjes së tij.