Policia e Kosovës para një jave ka marr një informatë nga një qytetar, për “planifikimin e vrasjes” së Kryetarit të Prishtinës, Shpend Ahmeti.

PK tashmë është duke e analizuar këtë informatë si dhe ka njoftuar edhe Kryetarin Ahmeti dhe ka shtuar masat e sigurisë.

Koha Ditore raporton se flitet për një shumë të madhe të parash dhënë për kryerjen e atentatit kundrejt Ahmetit. Në këtë tavolinë ka pasur edhe biznesmenë që mirren me ndërtime, tregti dhe biznesin e karburanteve.

Këto hetime është duke i kryer Drejtoria e Krimeve të Rënda në PK. Zyrtari për Informim i PK’së,Brahim Sadria ka thënë se këtë rast janë duke e trajtuar në përputhje me autorizimet.

“Ne jemi në dijeni të këtij informacioni dhe jemi duke e trajtuar atë në përputhje me autorizimet” .

Ndërkaq, Kryetari Shpend Ahmeti ka konfirmuar se është i informuar për një rast të tillë.

“Unë qysh në fillim i kam ndërmarrë masat e sigurisë për shkak se kam nisur rrënimet në Prishtinë. Policia më ka informuar për këtë në kuadër të masave të sigurisë që ndërmerr”, ka thënë Shpend Ahmeti.

Burime nga Policia e Kosovës kanë thënë për “Koha Ditore” se personi që kishte dëgjuar bisedën në një restaurant të Prishtinës punon në institucionet e Kosovës. Ai ika treguar një anëtari të Lëvizjes Vetëvendosje për atë se çka kishte dëgjuar, dhe pastaj anëtari i VV’së, kishte shkuar menjëherë në Polici.