Kolektivi për Mendim dhe Veprim Feminist ka reaguar ndaj rastit të fundit ku 27 vjeçari Agon Zejnullahu dyshohet të ketë vdekur pas dhunës së ushtruar nga Policia e Kosovës gjatë arrestimit të tij.

Ky kolektiv kanë shkruar disa parulla në Lipjan duke reaguar në lidhje me këtë rast.

“Policia e Kosovës të ndrysh deri sa të vret”, “Kush na mbron prej Policisë?”, “Policia i ka duart me gjak”, “Policia të vret”, “Poshtë brutaliteti policor”, janë disa nga parullat e tyre.

Ata gjithashtu kanë thënë se brutaliteti policor që e la pa frymë Agonin nuk ishte shpërdorim i izoluar i forcës dhe pushtetit, por një normë e cila e përshkon raportin që institucioni i policisë ka krijuar me civilët/et.

“Brutaliteti është qenësor në ekzistencën dhe funksionin e policisë. Ndërveprimi përmes dhunës, frikësimit, dehumanizimit, shqetësimit e tentativës për kontroll është rutinore për shumë prej nesh që ndeshemi me këtë institucion”, thuhet në reagimin e Kolektivit për Mendim dhe Veprim Feminist.

Ndër të tjera, ata kanë thënë se ndonëse konteksti historik i krijimit të policisë shtetërore të pavarur nga kolonializmi dhe okupimi jugosllavo-serb e ka ndërtuar një raport specifik të shoqërisë tonë me policinë, ajo nuk e ka tjetërsuar funksionin e saj kyç -ruajtja e interesave të klasës sunduese përmes forcës.