Kryetarja Mimoza Kusari-Lila, tha se me të dëgjuar për këtë çështje, Komuna e Gjakovës në bashkëpunim me Policinë e Kosovës dhe me Drejtorinë e Arsimit ka marrë të gjitha masat për të vërtetuar bazën e këtyre informatave.

“Deri me tani asnjë rast nuk është raportuar në Polici me faktet dhe argumentet që do na jepnin bazë për të thënë që këto informata janë të vërteta, përkundrazi Policia ka ftuar në intervista plasuesit e dyshimeve në rrjetet sociale, por të gjitha kanë rezultuar si thashetheme dhe të pabaza. Gjendja e sigurisë në Komunën e Gjakovës është në nivel dhe nëse bëjmë krahasimin me vitet e kaluara kemi diku për 30% rënie të akteve që cenojnë sigurinë, që do të thotë se se nuk kemi vërejtur indikacione që do mund të arsyetojnë frikën dhe panikën e përhapur gjatë ditëve të fundit”, tha ndër të tjera Kusari-Lila.

Gjithashtu, edhe Komandanti i stacionit policor në Gjakovë, Kristë Gjokaj theksoi që këto postime kanë qenë thashetheme dhe nuk ka pasur fakte për këto deklarata.

“Edhe përkundër faktit që nuk kemi pasur zyrtarisht deklarime në Polici, ne i kemi intervistuar 5 raste në bazë të përshkimeve të publikuara, që kanë rezultuar të pavërteta”.

Diana Çarkaxhija, drejtoreshë e Arsimit, tha se ka qenë në kontakt me të gjithë drejtorët e shkollave të cilët nuk i kanë konfirmuar ndonjë rast konkret dhe me bazë për këto dyshime.

Sipas një komunikate të Komunës së Gjakovës, në fund të konferencës për media, kryetarja e Komunës së Gjakovës, komandanti i stacionit policor dhe drejtoresha e arsimit kanë zhvilluar një takim me nxënësen dhe prindin e njërit nga rastet që kishin ngritur këto dilema, por as gjatë këtij takimi nuk kishte informata konkrete që mund ta pohonin se ka ekzistuar një tentim rrëmbimi.