Misioni i OSBE’së në Kosovë duket të jetë i gatshëm për t’i hyrë edhe një procesi tjetër “lehtësimi” të zgjedhjeve lokale në veri të Kosovës.

Zyrtarë të këtij Misioni kanë thënë sot për lajmi.net se janë duke përcjellë zhvillimet në Komunën e Mitrovicës së Veriut, e cila do të shkojë përsëri në zgjedhje për Kryetar të Komunës, pasi që Kryetari i zgjedhur, Krstimir Pantic nuk pranoi ta nënshkruajë deklaratën e betimit për shkak të pranisë së simboleve shtetërore të Kosovës në të.

“Ne jemi duke përcjellë të gjitha zhvillimet që janë duke ndodhur ditëve të fundit dhe jemi të gatshëm të ndihmojmë në implementimin e Marrëveshjes së Brukselit”, ka thënë Nikola Gaon, Zëdhënës i Misionit të OSBE’së në Kosovë.

Megjithatë, ende nuk është e qartë nëse do të duhet të ketë nevojë për një ftesë të re nga ana e institucioneve të Kosovës.

Marrëveshja e Brukselit e arritur në prill të vitit të kaluar nga Kryeministrat e Kosovës dhe Serbisë, Hashim Thaçi dhe Ivica Dacic, ia kishte ngarkuar Misionit të OSBE’së në Kosovë detyrën për “lehtësimin” e procesit zgjedhor në katër komunat e pjesës veriore të Kosovës: Mitrovicë e Veriut, Zveçan, Leposaviq dhe Zubin Potok.