Milani angazhoi një numër të konsiderueshëm përforcimesh gjatë afatit kalimtar të janarit.

Mirëpo, të gjitha ato pa shpenzuar asnjë euro të vetme.

Rossonerët kanë dëshpëruar me rezultatet e deritashme në Serie A dhe nënkryetari Adriano Galliani u desh të ndërhynte në tregun e futbollistëve për të gjetur zgjidhje dhe i solli trajnerit të ri Clarence Seedorf katër përforcime: Adil Rami, Keisuke Honda, Michael Essien dhe Adel Taarabt.

Shkojmë me radhë. Rami iu bashkua Milanit nga Valencia në formë huazimi me mundësi të blerjes gjatë verës për 7 milionë euro.

Honda më në fund erdhi në San Siro pas spekulimeve afatgjate nga fundi i edicionit të kaluar dhe më në fund Galliani i siguroi shërbimet e tij pa paguar kompensim për yllin japonez.

Essien nuk zinte vend në Chelsea dhe gjiganti londinez e la të lirë në mënyrë që ai të kalonte në Milan. Dhe, në fund Taarabt, po ashtu përforcim i ardhur si huazim, pa paguar ndonjë shumë për blerjen e tij.

Në përgjithësi, futbollistë për secilin repart, pa paguar asgjë. Tani mbetet të shihet kontributi i tyre në fushë.