Përfaqësuesi i BE-së në Serbi nuk ka kritika për fjalimin e Ramës

Ambasadori Michael Davenport shef i delegacionit të BE-së në Serbi nuk ka thënë asnjë fjalë kritike ndaj fjalimit të kryeministrit Edi Rama në Beograd, të cilin kryeministri serb Aleksandar Vuçiq e cilësoi si provokim. Ai tha se e rëndësishme është që kryeministrat e Shqipërisë dhe Serbisë u takuan pas 68 vjetësh, dhe se dialogu mes Beogradit dhe Tiranës është mirë që të vazhdojë. 

Lajme

15/11/2014 21:39

Davenport në një intervistë për gazetën serbe “Danas”, theksoi se përgëzon kryeministrin Aleksandër Vuçiq për gatishmërinë e organizimit të vizitës së Ramës në Beograd, transmeton lajmi.net.

Ai tutje ka thënë se shpreson që ky takim është vetëm fillimi i një procesi, ku Serbia dhe Shqipëria, pas 68 viteve lëvizin drejt një bashkëpunimi më të ngushtë që do të ketë efekte pozitive për të dy vendet por edhe për rajonin.

I pyetur për takimin që Vuçiq menjëherë pas vizitës së Ramës, pati me ambasadorët e Kuintit, ku mori pjesë edhe Davenport, ai tha se ishte një takim i rregullt në të cilën u diskutuan disa tema.

“Kryeministri na ka informuar në lidhje me vizitën e kryeministrit të Shqipërisë, si dhe diskutimet rreth FMN-në dhe shumë tema të tjera me interes për Serbinë dhe komunitetin ndërkombëtar” tha ai.

Davenport gjithashtu mohoi se ai ishte në dijeni në lidhje me pretendimin e kryeministrit Vuçiq se kishte presion ndaj tij nga disa ambasadorë të Perëndimit për të lejuar vëllain e kryeministrit shqiptar Edi Rama që t’i lejohet të ndjekë ndeshjen e futbollit ndërmjet Serbisë dhe Shqipërisë. (lajmi.net)