Oferta, sipas burimeve të besueshme të gazetës Tribuna, në rend të parë i drejtohet Lidhjes Demokratike të Kosovës, por nuk përjashtohet që e njëjta t’i drejtohet edhe Aleancës për Ardhmërinë e Kosovës.

Qëllimi kryesor i kësaj pakoje të PDK-së, thuhet të jetë dakordimi në mes liderëve politikë për ndarjen e posteve kryesore, atij të kryetarit të Kuvendit, kryeministrit, zëvendëskryeministrave dhe ministrive, si dhe nëse ka vullnet nga subjektet tjera, të shprehet edhe pretendimi për postin e presidentit, por i cili do të zbatohej pasi që t’i përfundonte mandati presidentes Atifete Jahjaga.

Këtë ofertë, burime nga PDK-ja e pranojnë se kjo parti politike e bën për dy qëllime.

E para, që të provojë të mbledhë ndonjë nga partitë e bllokut rreth vetes.

Dhe, e dyta, nëse nuk ka vullnet nga partitë e Bllokut për koalicion me PDK-në, përfundimisht të shkohet në opsionin e zgjedhjeve.

Megjithatë, këto burime nuk e fshehin që në PDK ka një shqetësim se si do të veprohej në rastin kur presidentja Atifete Jahjaga do t’u jepte edhe partive të VLAN-it mandatin për formimin e qeverisë.