Televizioni Klan Kosova ka bërë të ditur largimin e Atilla Kardesh nga shtëpia e Big Brother VIP Kosova 3, duke transmetuar pamjet e momentit të largimit të tij.

Ky vendim vjen pas një reagimi të fortë publik nga shoqëria civile dhe institucione të ndryshme, përfshirë edhe Ministrinë e Drejtësisë.

Reagimet u intensifikuan pas hyrjes së tij në të njëjtën shtëpi me ish-bashkëshorten e tij, Drenusha Latifi, e cila në të kaluarën e ka akuzuar Kardesh për dhunë dhe ka qenë e pajisur me urdhër mbrojtjeje. Prania e tij në program së bashku me ish-partneren ka shkaktuar shqetësime të mëdha, me kërkesa nga publiku dhe institucionet për marrjen e masave për të shmangur çdo situatë që mund të shkaktonte stres ose kërcënim për Drenushën.

Ministria e Drejtësisë gjithashtu ka reaguar lidhur me këtë çështje, duke theksuar rëndësinë e respektimit të të drejtave dhe sigurisë për viktimat e dhunës në familje dhe duke i bërë thirrje televizionit dhe organizatorëve që të marrin parasysh rregullat për mbrojtjen e personave vulnerabël.

Ndërkohë, rrjetet sociale janë mbushur me komente dhe reagime që mbështesin vendimin për të garantuar një mjedis të sigurt dhe të drejtë për të gjithë pjesëmarrësit e këtij formati të njohur televiziv.

Atilla Kardesh u bë pjesë e BBVK dy ditë më herët, saktësisht në spektaklin e zhvilluar të hënë. Si fillim ai u shfaq me shumë vetëbesim, e duke u deklaruar si i “papenduar” për ato që kishin ndodhur mes tij dhe Drenusha Latfiit.

Madje Drenusha deklaroi se po priste së paku një kërkim falje.

Por nga presioni i madh publik siç duket KlanKosova u “dorëzua” dhe vendosi ta largojë nga shtëpia Atillën./Lajmi.net/