Pas kërcënimeve të Vuçiq, MPJ e Kosovës: Dialogu me Serbinë pas anëtarësimit të Kosovës në NATO

Ministria e Punëve të Jashtme dhe Diasporës e Kosovës nëpërmjet një komunikate për media ka thënë se Kosova duhet të fillojë anëtarësimin e Kosovës në NATO e pastaj të vazhdojë dialogun me Serbinë.

Lajme

12/11/2020 17:55

MPJD e Kosovës ka reaguar ndaj deklaratave të Vuçiq i cili sot tha se konfliktet e ngrira mund të dërgojnë në konflikte të rrezikshme duke përmendur Nagarno-Karabakhin, shkruan lajmi.net.

Në reagimin e MPJD thuhet se Kosova nuk është as Nagarno-Karabakh e as konflikt i ngrirë.

Sipas MPJD-së, Rusia dhe Serbia janë furnizueset kryesore me armë në konfliktin e armatosur në Nagarno-Karabakh dhe po tentojnë të tërheqin paralele të tillë me qëllim të arsyetimit të armatimit të Serbisë.

“Të gjitha përpjekjet ruso-serbe për të minuar stabilitetin, paqen dhe sigurinë në rajon janë të papranueshme për Kosovën, në kundërshtim me vlerat evropiane e universale, dhe do të dështojnë ashtu siç kapitulluan turpshëm në Kosovë vitin 1999.”, thuhet në këtë komunikatë.

Ky është reagimi i plotë:

Kosova të fillojë anëtarësimin në NATO, pastaj të vazhdojë dialogun me Serbinë!

Ministria e Punëve të Jashtme dhe Diasporës e Republikës së Kosovës reagon ashpër ndaj deklaratave tendencioze të presidentit serb Aleksandar Vuçiq, ish ministër dhe bashkëpunëtor i afërt i Sllobodan Millosheviqit, i cili sot kërcënoi hapur me luftë të re në Ballkan të gjitha shtetet fqinje të rreshtuara me NATO-n, duke thënë se Serbia duhet të vazhdojë forcimin ushtarak.

Kosova nuk është as Nagorno-Karabakh, as konflikt i ngrirë. Reagimi dhe krahasimet e qëllimshme të Vuçiqit tregojnë qartazi qëllimin për destabilizim dhe krijimin e tensioneve të reja në rajonin e Ballkanit. Dihet botërisht pjesëmarrja e forcave të rregullta ushtarake serbe (përfshirë snajperistë) në Bjellorusi. Ushtarët e Serbisë janë parë të përfshirë aktivisht edhe në konfliktin në Ukrainë dhe është raportuar ndërkombëtarësh për përdorimin e armatimit serb në konfliktin Azerbajxhan-Armeni.

Është evidente dhe e qartë se pas imponimit të Rusisë në luftimet e rajonit të Nagorno-Karabakh, dhe paraqitjes së saj si “ndërmjetësuese për zgjidhjen e këtij konflikti nën sistemin “përçaj dhe sundo”, Rusia dhe Serbia si furnizueset kryesore me armë në këtë konflikt të armatosur po tentojnë të tërheqin paralele të tillë me qëllim të arsyetimit të militarizimit dhe armatimin e ushtrisë së saj me armatim jokompatibil me NATO.

Të gjitha përpjekjet ruso-serbe për të minuar stabilitetin, paqen dhe sigurinë në rajon janë të papranueshme për Kosovën, në kundërshtim me vlerat evropiane e universale, dhe do të dështojnë ashtu siç kapitulluan turpshëm në Kosovë vitin 1999. /Lajmi.net/