Parlamenti Evropian i Kulturës: Kosova duhet të pranohet si partnere në programin kulturor të BE-së
Parlamenti Evropian i Kulturës (ECP) ka mbyllur sot punimet e sesionit në 13-të që u mbajt nga data 3 tetor në Prishtinë. Ata kanë kërkuar që edhe Kosova të pranohet si partnere në programin kulturor të Bashkimit Evropian.
Lajme
Me këtë rast, rreth 100 anëtarët pjesëmarrës nga Evropa kanë nxjerrë një Deklaratë për Ukrainën dhe Rezolutën e Sesionit, në të cilën përveç të tjerash inkurajojnë Bashkimin Evropian që të përfshijë Kosovën në programet kulturore. ECP po ashtu vlerëson lartë rolin që shteti i Kosovës po i jep kulturës.
Gjatë tri ditëve janë diskutuar tema të ndryshme, ndër të cilat; roli i diplomacisë kulturore, artistët dhe barazia gjinore, roli i artistëve në konflikte, popullizmi në Evropë, e tema të tjera. Po ashtu gjatë këtyre ditëve pjesëmarrësit kanë pasur mundësi të shohin trashëgiminë kulturore të Kosovës. Për ta është organizuar edhe një koncert nga Ansambli Kombëtar i Këngëve dhe Valleve ‘Shota’.
Anëtarët e ECP-së kanë vlerësuar lartë organizimin sesionit të 13-të dhe kanë falënderuar Ministrinë e Kulturës, Rinisë dhe Sportit dhe Këshillin Britanik në Kosovë për mikpritjen.