Sami Khedira beson se “gjeniu” Mesut Ozil do t’i ndihmojë Arsenalit të përfundojë pritjen e gjatë për titullin e Premierligës.

Khedira luajti së bashku me Ozilin në Real Madrid dhe është bashkëlojtar me të në Kombëtaren e Gjermanisë. Ai e konsideron 24-vjeçarin si një prej futbollistëve më të mirë në botë, të aftë t’i ndihmojë ekipeve në realizimin e objektivave të rëndësishëm.

“Arsenal kishte një skuadër të fuqishme, por Mesut i bën ata ekipin më të mirë në Angli. Jam i sigurt se ai mund të bëhet futbollisti që i ndihmon ata të fitojnë kampionatin. Mesut është gjeni në fushë, nuk ka asnjë mënyrë tjetër për ta përshkruar”, deklaroi Khedira për mediet gjermane.

Ozil ka shkëlqyer me paraqitjet e para për gjigantin londinez, duke e ndihmuar ekipin të kryesojë në Premierligë dhe fitojë dy duelet e para në fazën e grupeve në Ligën e Kampionëve.