Ambasadorja Amerikane në Prishtinë, Tracey Ann Jacobson, ka vlerësuar si të arritur të vitit 2013 Marrëveshjen e 19 Prillit për normalizimin e marrëdhënieve mes Kosovës dhe Serbisë, të arritur mes Kryeministrave Hashim Thaçi dhe Ivica Dacic.

Në një intervistë për Radio Kosovën, Jacobson ka deklaruar t’i ketë lënë mbresa puna dhe përkushtimi i madh në Kosovë, përfshirë edhe ata që kanë diplomuar në SHBA, për të dhënë një kontribut në zhvillimin e mëtejmë në Kosovë.

“Kemi parë gjithë këtë punë të madhe, përfshirë edhe në dialogun me Serbinë”.

“Mendojmë se Marrëveshja e 19 prillit ka qenë një e arritur e jashtëzakonshme.”

“Natyrisht, mbetet edhe shumë punë për t’u bërë, sa i përket zbatimit të kësaj Marrëveshje. Por,  po shohim se Kosova ka hyrë në rrugë të drejtë dhe udhëheqësia e Kosovës e ka vënë në pah punën dhe të mirat si dhe përfitimet e qytetarëve të Kosovës në afat të gjatë, e jo ato qëllimet afatshkurta”.

Ambasadorja Amerikane, po ashtu, ka vlerësuar edhe përfundimin e zgjedhjeve lokale me sukses, të zhvilluara në mënyrë demokratike dhe të lira.