Nikoliqi ikën nga përgjegjësia për Kosovën
Me deklarata të vazhdueshme kontroverse për Kosovën, sikundër ajo më e reja për nevojën e referendumit, Tomisllav Nikoliq në fakt po përpiqet të ikë nga përgjegjësia, vlerësojnë dy analistë të njohur serbë.
![](https://lajmi.net/wp-content/uploads/media/image/201412/full/66796800_66803300.jpg)
Lajme
Sipas Nikoliqit, zgjidhja për Kosovën është referendumi në të cilin populli do të deklarohej se nën çka Serbia nuk guxon të lëshohet në negociatat e Brukselit. Ai në një emision televiziv ka deklaruar se nëse qytetarët do të deklaroheshin për nënshkrimin e pavarësisë së Kosovës, ai do të largohej nga funksioni i presidentit.
“Nuk ka te Nikoliqi kurrfarë zgjidhjeje të re për Kosovën. Risi në propozimet e tij është ajo që kryeministri duhet të dalë para Kuvendit para vazhdimit të dialogut. Mendoj që esenca e propozimit të Nikoliqit është që ta vërë kryeministrin Vuçiq dhe qeverinë nën monitorim. Risia tjetër me siguri do të shkaktojë reagime të mëdha, sepse ka të bëjë me kundërshtimin e pezullimit të të gjitha institucioneve paralele, gjë që është në kundërshtim të plotë me marrëveshjen e Brukselit, të cilën Serbia e ka nënshkruar. Dhe, ideja e tretë është ajo për referendumin”, thotë për gazetën serbe Blic Dushan Janjiq nga Forumi për marrëdhënie etnike.
Shpallja e referendumit nuk është në kompetencë të presidentit të Serbisë, por sipas kushtetutës atë e shpall Kuvendi me kërkesën e shumicës së deputetëve apo të paktën 100,000 zgjedhësve, transmeton lajmi.net.
Profesori i Fakultetit të Shkencave Politike, Predrag Simiq, thotë se Nikoliq po ikën nga përgjegjësia për Kosovën.
“Po afrohet vazhdimi i negociatave të Brukselit, të cilat shumëkush në Serbi i përjeton si negociata për pavarësinë e Kosovës. Ato negociata me siguri do të kenë pasoja politike dhe Nikoliq thjesht kërkon qysh tash t’i ikë kësaj. Shqiptarët janë të padurueshëm, kurse ne jemi pa përkrahje tradicionale të Rusisë, e cila është rrasur në probleme të veta. Marrëveshja e Brukselit është nënshkruar, kurse Serbia tash shkon në Bruksel si pëllumb shënjestre. Nikoliq është shumë i vetëdijshëm për këtë”, sqaron Simiq, transmeton lajmi.net.