Neymar ka thënë se ka lënë gjurmë në Evropë pasi het-triku i tij i ndihmoi Barcelonës të fitojë 6:1 kundër Celticut.

Reprezentuesi brazilian realizoi tri herë brenda 13 minutash derisa gjiganti katalan e përfundoi fazën e grupeve me fitore, të kompletuar pas shënimeve nga Gerard Pique, Pedro dhe Cristian Tello.

Para ndeshjes, trajneri Gerardo Martino kishte kërkuar nga përforcimi i ri Neymar që të shërbejë gola për Barcelonën pas mungesës së Lionel Messit për shkak të lëndimit, dhe ai e kreu detyrën.

“Jam shumë i lumtur, jo vetëm për tre golat në Ligën e Kampionëve, por edhe për fitoren e ekipit”, deklaroi Neymar pas ndeshjes pas golave të tij të parë në garën elite të klubeve evropiane.

I pyetur nëse preferon të luajë në qendër më tepër se në krah, ai refuzoi të shfaq preferencë.

“Preferoj të luaj, nuk më intereson nëse në mes ose në krah”, u shpreh ai. Ndeshja e ardhshme e Barcelonës do të jetë në udhëtim te Villarreal të shtunën, pasi kryesuan Grupin H në Ligën e Kampionëve.