Burime të televizionit Rrokum brenda kësaj partie pohojnë se AKR është përcaktuar për të vazhduar bashkëqeverisjen me PDK, por me këtë nuk pajtohen të gjithë.

Madje thuhet se presidenti i AKR-së, Pacolli ka marrë ultimatum nga kryetari i Mitrovicës, Agim Bahtiri, i cili përmes një letre ia ka bërë të qartë presidentit të tij se nëse arrin marrëveshje për koalicion me PDK-në, atëherë ai do ta lë AKR-në dhe do ti bashkëngjitet LDK-së.

Bahtiri ka konfirmuar për Rrokum se tashmë i ka dërguar letër shefit të partisë së tij, e cila ka të bëjë me lidhjen e koalicioneve paszgjedhore, ndonëse nuk ka dhënë shumë detaje për përmbajtjen e saj. Bahtiri, po ashtu, pranoi se mes tij e AKR-së nuk është duke shkuar gjithçka mirë.

Ekipi i këtij televizioni ka provuar të marrë përgjigje në zyrat qendrore të AKR-së lidhur me këtë, por nuk ia ka dalë, me arsyetimin se nuk kanë çka të komentojnë për këtë çështje.