Këto rezultate ende nuk janë publikuar zyrtarisht, por në mënyrë gojore për këto gjetje është njoftuar edhe Kryetari i Komisionit për Persona të Pagjetur, Prenkë Gjetaj.

“E dimë që ka rezultate, por emrat ende nuk na i kanë sjellë. Janë të përkatësisë etnike shqiptare të Kosovës”.

“Zyrtarisht rezultatet i marrim prej së hënës e andej. Gojarisht jam njoftuar nga Komiteti Ndërkombëtar i Kryqit të Kuq”, ka thënë Gjetaj për “Koha Ditore”.

Për këto rezultate, në mënyrë jo zyrtare është informuar edhe Drejtori i Mjekësisë Ligjore Arsim Gërxhaliu. Ai thotë se nuk ka “mëdyshje” se trupat janë shqiptarë të Kosovës

“Dje na është konfirmuar se pala serbe ka marrë rezultatet e ADN-së, por neve nuk na janë dorëzuar ende. Nuk ka mëdyshje se bëhet fjalë për shqiptarë të Kosovës dhe i takojnë luftës së fundit”.

Besohet se në Rudnicë janë varrosur mbi 250 persona dhe shumica  e tyre vijnë nga rajoni i Drenicës.

Besohet se janë tri lokacione që kanë të varrosur trupa të civilëve shqiptarë. Të gjitha këto janë në rajonin e Rashkës. Vetëm kjo e Rudnicës deri më tani është konfirmuar.