Në prag të festave të fundvitit, Kryeministri i Kosovës, Hashim Thaçi, ka vizituar familjen e Enver Zymberit, policit të vrarë në krye të detyrës në pjesën veriore të Kosovës.

Thaçi e ka vlerësuar kontributin e Enver Zymberit, i cili është shpallur Hero i Kosovës, duke thënë se sakrifica e tij ka bërë që sot në Kosovë të funksionojë rendi kushtetues në tërë territorin.

“Sot vizitova familjen e Heroit të Kosovës, Enver Zymberi, policit të rënë në krye të detyrës në aksionin e 25 korrikut 2011”.

“25 Korriku 2011 shënon ditën e bashkimit të territorit të Republikës së Kosovës. Dhembjen edhe krenarinë me familjen Zymberi do ta ndajmë gjithmonë. Sakrifica e heroit Enver Zymberit bëri që sot në Kosovë të funksionojë rendi kushtetues, në tërë territorin e Kosovës”.

“Qoftë i përjetshëm kujtimi për Heroin e Kosovës, Enver Zymberi!”, ka shkruar Hashim Thaçi në Facebook.