Sipas një komunikate për medie të lëshuar nga Ministria e Integrimeve Evropiane, gjatë takimit u diskutuan të gjeturat dhe rekomandimet e draft Raportit të Progresit për vitin 2014.

Në Bruksel është diskutuar për MSA-në dhe për liberalizimin e vizave, ku KE është pajtuar me delegacionin kosovar që institucionet e Kosovës të fokusohen në zbatimin e Planit të Veprimit, pasi që në fund të vitit do të dorëzohet edhe raporti vlerësues mbi zbatimin e këtij dokumenti.

“Në veçanti u diskutua progresi dhe sfidat në kuadër të kritereve politike, ekonomike dhe standardeve Evropiane. Diskutim i veçantë u zhvillua rreth procesit të miratimit të MSA-së dhe përmbushjes së kritereve afatmesme të Studimit të Fizibilitetit”.

“Po ashtu, gjatë ditës u mbajt edhe takimi teknik në kuadër të procesit të liberalizimit të vizave, me ç’rast delegacioni i Kosovës ka prezantuar draft Planin e Veprimit për zbatimin e rekomandimeve të raportit të fundit të Komisionit Evropian”.

“Komisioni Evropian vlerësoj lartë efikasitetin dhe efektivitetin e institucioneve të Kosovës në kuadër të përgatitjes së Planit të Veprimit dhe dy delegacionet u pajtuan që institucionet e Kosovës tani të fokusohen në zbatimin e Planit të Veprimit dhe rrjedhimisht deri në fund të vitit të dorëzojnë raportin e vlerësues mbi zbatimin e Planit të Veprimit”, thuhet në komunikatën e lëshuar nga Ministria e Integrimeve.

Delegacioni i Kosovës ka qenë i udhëhequr nga Gëzim Kasapolli, u.d. Ministër i Integrimit Evropian, ndërsa ai i BE-së nga Jean-Eric Paquet, Drejtor për Ballkanin Perendimor, Drejtorati i Përgjithshëm i Zgjerimit në Komisionin Evropian dhe Ioan-Dragos Tudorache, Shef i Njësisë për Çështjet Ndërkombëtare, Drejtorati i Përgjithshëm për Çështje të Brendshme në Komisionin Evropian.