Ky veprim i institucioneve qeveritare ngjalli shumë reagime.

Arton Demhasaj nga organizata ‘Qohu’ në një prononcim për RTV Dukagjinin, këtë vendim e quajti të padrejtë dhe diskriminues.

“Ky nuk është një sinjal i mirë për qytetarët e Kosovës, të cilët në vazhdimësi kanë bërë kërkesa në Ministrinë e Shëndetësisë, për t’u ndihmuar për shërim jashtë vendit. Përderisa një pjesë e madhe e këtyre kërkesave refuzohen për shkak të mungesës së fondeve, në anën tjetër zyrtarët publik dalin për t’u shëruar jashtë vendit, me fonde që ndahen direkt nga Qeveria e Kosovës”, deklaroi Demhasaj.

Ndërkaq, Kryetari i Federatës së Sindikatave të Shëndetësisë së Kosovës, Blerim Syla, ndarjen e këtyre mjeteve e sheh të paarsyeshme pasi sipas tij sëmundja e Bukoshit mund të trajtohet edhe në Kosovë.

“Ne kemi shërbim onkologjik, kemi edhe urologjinë, ku edhe vetë z.Bukoshi është urolog. Nuk e di pse është dashtë ato para me u shpenzua jashtë, kur ato shërbime ai ka mundur me i marrë edhe në Kosovë”, shprehet Blerim Syla.

Këshilltari i Kryeministrit Halil Matoshi, përmes një përgjigjeje telefonike për RTV Dukagjinin, tha se ky vendim është marr për të vlerësuar kontributin që Bukoshi ka dhënë për Kosovën.

Vetëm gjatë këtij viti, në Ministrinë e Shëndetësisë kanë qenë 721 qytetar që kanë kërkuar shërim jashtë vendit.