Ndalohen dy persona në Gjakovë, dyshohet se rrëmbyen një tjetër person
Prokuroria Themelore në Gjakovë ka ndaluar dy persona M.G dhe A.B., dyshohen për rrëmbim.
Lajme
Prokuroria Themelore në Gjakovë, Departamenti për Krime të Rënda në bashkëpunim me Njësinë e Hetimeve të DRP-së në Gjakovë, me datë 12.11.2018, kanë ndaluar dy persona M.G dhe A.B.
Nën dyshimin se të njëjtit me datën 11 .11.2018 në fshatin Bec të Gjakovës kanë rrëmbyer personin I.J., nga fshati Rashkoc i Gjakovës në atë mënyrë që e kanë kërcënuar me armë dhe e kanë detyruar të futet në automjetin e tyre, dhe e dërgojnë tek liqeni i Radoniqit, njofton prokuroria, përcjell lajmi.net.
Siç thuhet në njoftim, arsyeja e rrëmbimit është se viktima I.J., ka marrë pjesë në zgjidhjen e një kontestit në mes të motrës së pandehurit M.G., dhe bashkëshortit të saj, duke e kanosur që këtë çështje ta zgjidhë në favor të tyre, te cilën gjë viktima “ka pranuar ta bëjë”.
Prokurori i çështjes i ka propozuar Gjykatës Themelore në Gjakovë, që ndaj të pandehurve të caktohet masa e paraburgimit në afat prej 30 ditësh. /Lajmi.net/