Milani kurrsesi të sheh dritë me sy. Rossonerët nuk arritën të fitojnë as kundër Genoas duke barazuar në San Siro me rezultat 1:1, edhe pse për gati një orë ishin në avantazh numerik dhe patën një penallti në favor.

Dueli i xhiros së 13-të në Serie A nisi mirë për Milanin, Leite Kaka shënoi herët në minutën e katërt mirëpo Genoa u kundërpërgjigj duke barazuar rezultatin nëpërmjet golit të realizuar nga penalltia nga ish sulmuesi i Rossonerëve, Alberto Gilardino.

Genoa mbeti me dhjetë futbollistë pas përjashtimit të Thomas Menfredinit në minutën e 35-të, pas ndërhyrjes si lojtari i fundit, me ç’rast u akordua penallti në favor të vendasve. Por, Mario Balotelli gaboi – për herë të dytë në karrierë – pasi goditjen e tij të plogësht e priti portieri i ri Mattia Perin.

Në vazhdim, Milani e kishte kontrollin e plotë të lojës por nuk shfrytëzoi disa raste të mira për shënim dhe u ndal në barazim që e lë 18 pikë prapa liderit Romës.

Edhe më keq kaloi Napoli që pësoi disfatën e dytë të njëpasnjëshmë në Serie A duke u mundur në shtëpi nga Parma me rezultat minimal 1:0 pas golit nga Antonio Cassano.