Muharremaj kërkon nga organet e sigurisë parandalimin e vjedhjeve në Suharekë
Kryetari i Komunës së Suharekës, Bali Muharremaj, ka reaguar ndaj vjedhjeve që po ndodhin ditëve të fundit në këtë vend.
Lajme
Muharremaj bëri me dije se ka pranuar shumë mesazhe për këtë dukuri, dhe se qytetarët janë shumë të pasigurt nga thyerjet dhe vjedhjet që po ndodhin në shtëpitë e tyre.
“Kohën e fundit kam marrë shumë mesazhe nga qytetarët, të cilët janë të shqetësuar për vjedhjet e thyerjet që po ndodhin nëpër shtëpi. Ky fenomen po ndodhë në shumë fshatra, që si duket ka treguar edhe pasiguri tek ata. Si Kryetar i Komunës së Suharekës, kam zhvilluar disa here takime me policinë dhe u kam ofruar bashkëpunim për aq sa më lejon ligji, përkundër dëshirës që të bëjë më tepër.”
I pari i Suharekës ka zhvilluar takim me organet e sigurisë së kësaj komune, duke kërkuar nga ata që të ndërmarrin masa.
“Kërkoj nga sektorët e sigurisë në Prishtinë dhe Suharekë, që të bëhet shumë më tepër në parandalimin e kësaj dukurie, përkundër asaj që e vlerësoj punën e deritanishme.”
Ai bëri thirrje edhe në bashkëpunim më të madh qytetar-polici.