MSH-ja infektohet me variantin Gërvalla: Thotë se masat e reja do hyjnë në fuqi më 2020-ën

Lajme

21/01/2022 20:33

Ministria e Shëndetësisë në njoftimin për masat e reja të ndërmarra nga ky institucion ka bërë një lëshim të çuditshëm.

MSH-ja thotë se data e cila do të futen në fuqi këto masa të reja do të jetë 22 janar 2020, shkruan lajmi.net.

“Masat e miratuara hyjnë në fuqi nesër, më 22 janar 2020 dhe vlejnë deri më 4 shkurt 2022”, thuhet në njoftim.

Në masat e reja të ndërmarra, kufizimi i lëvizjes do të jetë nga ora 22:00 deri në orën 05:00, për dallim që deri tash niste nga ora 00:00.

Po ashtu, çdo person i cili hyn në Republikën e Kosovës duhet të posedojë një nga dëshmitë e mëposhtme:

*Certifikatën e vaksinimit me tri doza (ose me një dozë të vaksinës Janssen dhe dozë përforcuese) kundër COVID-19;

*Certifikatën e vaksinimit me dy doza (ose me një dozë të vaksinës Janssen) kundër COVID-19, bashkë me testin RT-PCR negativ për COVID-19, jo më herët se 48 orë para nisjes (për udhëtarët që hyjnë në rrugë ajrore) ose 48 orë para mbërritjes në pikën kufitare (për ata që hyjnë në rrugë tokësore).

*Shtetasit e Republikës së Kosovës që nuk i kanë dy doza të vaksinës janë të detyruar të kryejnë karantinim shtëpiak për një periudhë prej shtatë ditësh që nga hyrja në territorin e Republikës së Kosovës.

Procesi mësimor do të zhvillohet siç është bërë deri tash.

Pensionistët vazhdojnë të jenë të liruar nga paraqitja e rregullt.

Mbledhjet në ambiente të mbyllura lejohen me maksimum 30 persona.

Ndalohet veprimtaria e klubeve të natës dhe organizimi i festivaleve, koncerteve, apo dasmave e fejesave. Ndalohet edhe mbajtja e pritjes për ngushëllim.

Gastronomisë i lejohet puna deri në orën 21:00. Muzika në lokalet e gastronomisë lejohet deri në orën 20:30.

Masat e miratuara hyjnë në fuqi nesër, me 22 janar 2022 dhe vlejnë deri më 4 shkurt 2022. /Lajmi.net/