Libri përfundon me porosinë: “Kush nuk beson le ta pijë ujin me shkumësin e tretur në të dhe do të shikojë se sa shpejt do t’i ngrihet temperatura”.

Këtë libër e ka lejuar të botohet dhe të përdoret Ministria e Arsimit, Shkencës dhe Teknologjisë (MASHT), ndërsa ky është vetëm njëri ndër lëshimet e shumta që janë evidencuar nëpër tekstet shkollore, ndryshimi i të cilave po kërkohet të bëhet domosdo nga ekspertët e arsimit.

E në një tjetër mësim, po ashtu në Librin e Leximit të klasës IV është një anekdotë me titull “Tërshanë n’sofër për darkë”, në të cilët përdoret gjuhë jostandarde dhe me fjalë fyese. Ndër të tjera aty shkruan se “ky shoki jem asht kali i madh”.

Janë këto vetëm disa nga gabimet e shumta logjike e edukative, drejtshkrimore e teknike që janë bërë nëpër librat shkollorë të sistemit arsimor të Kosovës, e të cilat kanë ngritur shqetësim tek prindërit, nxënësit dhe profesionistët e arsimit.

Eqrem Basha nga shtëpia botuese “Dukagjini” ka thënë për “Kohën Ditore” se si botues marrin pjesë në konkurset të cilat janë anonime, kurse Ministria i vlerëson dorëshkrimet e arritura me ndihmën e recensentëve që vetë i cakton.

Në bazë të recensioneve shtëpitë botuese bëjnë korrigjime nëse recensentët e kërkojnë këtë, ndërsa Ministria lëshon vendimin për botimin e tekstit në fjalë.

“Pra, asnjë tekst që përdoret në shkolla fillore dhe të mesme nuk mund të botohet pa vendimin e Ministrisë”, ka thënë Basha.