Milani ka mbetur shumë i impresionuar me punën e Hakim Ziyech në Kupën e Botës dhe ata po përgatisin një ofertë për anësorin e Chelseat.

Sulmuesi maroken ka qenë një figurë e rëndësishme për vendin e tij në Kupën e Botës në Katar, duke dhënë një asistim kyç në fitoren 2-0 ndaj Belgjikës të dielën.

Ziyech ka performuar mirë në të dyja ndeshjet e Marokut në turne dhe ai do të shpresojë të shkëlqejë në ndeshjen e tyre të fundit në grup kundër Kanadasë, duke i ndihmuar ata të përparojnë në fazat e eliminimit.

Siç raportohet nga ‘La Gazzetta dello Sport’, Milani ka ndjekur nga afër punën e Ziyech në Kupën e Botës dhe ka vendosur të bëjë një lëvizje serioze për të në janar.

Paolo Maldini dhe Frederic Massara po kërkojnë t’i ofrojnë Chelseat një marrëveshje huazimi me një opsion blerjeje të bashkangjitur në janar, me vlerë pak më shumë se 15 milionë euro.

Një pengesë mund të jetë paga e marokenit. Ziyech fiton rreth 6 milionë euro neto në sezon, gjë që do ta bënte atë një nga lojtarët më të paguar në skuadër, por mungesa e komisioneve të agjentëve mund të ndihmojë në lehtësimin e një lëvizjeje./Lajmi.net/