Mediat në Shqipëri raportojnë se burime zyrtare bëjnë me dije se është vënë në pranga Demir Hoxha, 62 vjeç lindur në Gramsh dhe banues në fshatin Zharnec Divjakë, i cili akuzohet për marrëdhënie seksuale me dhunë me një të mitur.

Burime nga policia sqarojnë se Hoxha me detyrë mësues në shkollën 9-vjeçare në Kryekuq akuzohet se ka abuzuar seksualisht me të miturën. Ky i fundit është denoncuar nga prindërit e të miturës, e cila i ka treguar nënës së vet se mësuesi abuzonte seksualisht me të. 62-vjeçari i arrestuar është mësues kujdestar i të miturës që ka bërë denoncimin.

“Policia ka bërë ndalimin e shtetasit Demir Hoxha, 62 vjeç, banues në fshatin Zharnec Divjake, me profesion mësues në shkollën nëntë­vjeçare. Akuzohet se ka kryer marrëdhënie seksuale me dhunë në mënyrë të përsëritur me shtetasen e mitur A.K, duke shfrytëzuar detyrën si mësues kujdestar i saj në shkollën 9-­vjeçare. Ngjarje kjo,e ndodhur në ambientet e kësaj shkolle”­ thuhet në njoftimin paraprak të policisë. Materiali hetimor për veprën penale “Marrëdhënie seksuale me dhunë me të mitur&Shpërdorim i Detyrës”, do t’i kalojë Prokurorisë pranë Gjykatës së Shkallës së Parë Lushnjë për veprime hetimore të mëtejshme”, – sqaron policia.

Flet drejtori i Shkollës

Menjëherë pas arrestimit të mësuesit 62-vjeçar ka folur për Neës24 drejtori i shkollës 9-vjeçare “Hysen Malko”, në fshatin Kryekuq të Divjakës ku jepte mësim i akuzuari. Drejtori Vasil Rrushi i tronditur ka thënë se Demir Hoxha ishte mësues prej 20 vitesh në këtë shkollë, por nuk ka pasur denoncime ndaj tij. Sipas drejtorit Rrushi, Hoxha ishte mësues i klasës së pestë, klasë që ka mbi 20 nxënës.

“Ngjarja tronditëse, është e pabesueshme. 62-vjeçari ishte mësues prej 20 vitesh në këtë shkollë. Nuk ka pasur denoncime më parë. Hoxha ishte mësues i klasës së pestë, klasa e tij ka mbi 20 nxënës. Ngjarjen tronditëse e mësuam nga mediat. Në shkollën “Hysen Malko” kjo s’ka ndodhur kurrë më parë. Presim nga organet e drejtësisë që ngjarja të hetohet”, ka thënë drejtori Vasil Rrushi.