Lionel Messi gjithmonë gjen motivim shtesë sa herë që takohet me Real Madridin. Ylli argjentinas ka shënuar 18 gola kundër Los Blancos, dhe atë me vazhdimësi të jashtëzakonshme, duke filluar nga het-triku në edicionin 2006-07.

Kundër Realit, ai gjithmonë është në nivelin e duhur. Përveç kësaj, Messi gjithmonë paraqitet në rolin kryesor sa herë që Barcelona ka nevojë për të.

Shembulli më i ri erdhi të martën mbrëma kur realizoi golin e barazimit kundër Milanit në ndeshjen e Ligës së Kampionëve.

Ai është paraqitur në një mënyrë të ngjashme edhe në duele të tjera të këtij edicioni. Uria e tij për gola është thjesht e jashtëzakonshme. Barcelona ka realizuar 37 gola në të gjitha garat këtë sezon, prej të cilëve Messi ka realizuar gati një të tretën (12).

Argjentinasi ka mesatare prej një goli për ndeshje në tri edicionet e fundit, kurse bilanci i deritashëm këtë sezon është 12 gola në 11 duele. Dallimi i madh është se këtë edicion nuk ka luajtur aq shumë.

Jo vetëm për shkak të problemeve me lëndime por edhe si rezultat i politikës së rotacionit të trajnerit të ri Tata Martino. Rëndësia e Messit për Barcelonën është e pamohueshme. Jo vetëm se shënon vazhdimisht, por golat e tij shpeshherë i vendosin ndeshjet.

Të shtunën në Nou Camp, është sfida e radhës, ndoshta më e rëndësishmja deri më tani këtë sezon. Dhe, Messi pritet të jetë në nivelin e detyrës.