Diego Maradona i ka thënë Lionel Messit të fitojë Kampionatin botëror për Argjentinën dhe të kënaqet me adhurimin e bashkëkombësve për mbarë jetën e tij.

26-vjeçari është paraqitur në Botërorin 2006 dhe 2010, por dështoi të shkëlqente për Argjentinën që në të dyja rastet u eliminua nga Gjermania.

Maradona beson se ylli i Barcelonës është pasardhës i vërtetë i tij dhe i bëri thirrje që të përcjell heroizmin e tij nga viti 1986. “Ka shumë futbollistë në Argjentinë që janë emëruar Diego i dytë”, tha Maradona për “Times of India”.

“Leo është i vetmi tek i cili shoh ngjashmëri. Hajde Leo, bëje për ne”, u shpreh ai.

“Shënoje një ‘golazo’ vendimtar dhe kënaqu me adhurimin e vendit tënd, për gjithë jetën”, përfundoi ai. Messi po ashtu ka pranuar se ëndërron të fitojë Botërorin me Argjentinën.